Númer 91
Ég lenti í frekar neyðarlegu atviki fyrir u.þ.b. mánuði síðan, svo neyðarlegu að ég tók ákvörðun um að það væri ekki blogghæft...en ég vil flest fyrir vini mína gera og Ásta greyið er að láta lífið úr prófalestri og ég verð að grípa til ráðstafana til að reyna að lífga hana við, eins gott að þetta virki, Njóttu Ásta mín...Seinasti mánuður var ofsalegur hjá mér, ég vann, vann og vann, svaf lítið, borðaði minna og var þar af leiðandi ekkert í besta ástandi. Föstudaginn sem jólabjórinn kom var ég að vinna til kl 23 og var búin að lofa mér í svolitla bjórdrykkju eftir vinnu þar sem að Þresti finnst J-dagurinn stórkostlegt fyrirbæri og ekki hægt að láta hann missa af jólabjórnum.
Þröstur, Ida vinkona og einhverjir fleiri komu til mín niður í vinnu og við lögðumst á kranann. Ég var lítið sofin og hafði ekkert borðað síðan kl. 14 þegar ég andaði að mér einni rúgbrauðssneið á hlaupum og var þess vegna farin að finna vel á mér á þriðja bjór. Til að gera langa sögu örlítið styttri þá varð ég skyndifull um leið og við komum inn á barinn sem varð fyrir valinu eftir að við fórum úr vinnunni hjá mér og dró Þröst heim (með stoppi á KFC...og ég var nógu full/svöng til að vibbamaturinn þar alveg hreint ágætur).
Morguninn eftir var ég ekkert áberandi hress, sat uppí sófa soldið þunn en meira bara uppgefin að horfa á sjónvarpið þegar það rifjaðist upp fyrir mér hvað ég hafði gert um nóttina, fyrst vonaði ég að þetta hefði verið draumur en því miður var það ekki.
Í ástandinu á milli svefns og vöku fæ ég oft mjög brilliant hugmyndir og því miður getur þetta ástand varað mjög lengi hjá mér, sérstaklega ef ég er langþreytt. Þessa nótt vaknaði ég eftir nokkurra tíma svefn alveg í spreng og fékk þá stórkostlegu hugmynd að pissa ekki klósettið heldur fara fram á gang og pissa í ruslalúguna. Ég opnaði hurðina, fór fram á gang í engu nema brók og nærbol horfði á lúguna og velti því svolítið fyrir mér hvernig ég ætti að ná upp og hitta á gatið og fattaði svo að ég var ekki með lykilinn að ruslalúgunni. Ég fór inn til að ná í lykilinn og æfði mig í huganum í að hoppa upp í lúgunu svo ég gæti pissað niður 4 hæðir. Sem betur fer tók ég þá ákvörðun þegar ég var komin inn að ég væri of þreytt til að halda mér í lúgunni og það væri auðveldara að gera bara eins og vanalega og pissa í klósettið sem ég gerði og skreið aftur upp í rúm.
Það er búið að gera soldið grín að mér á heimilinu og mér finnst þetta líka smá fyndið...en mér hefði kannski ekki fundist það ef ég hefði verið berrössuð eða mætt einhvjerum nágrannanum frammi á gangi á meðan ég var í þessum pælingum.
Hera, pissar í klósett
